काठमाडौं । निर्वाचन आयोगले प्रतिनिधिसभा सदस्य निर्वाचनमा उत्साहपूर्वक र सक्रिय रूपमा सहभागी हुन मतदातालाई आग्रह गरेको छ ।
निर्वाचनको पूर्वसन्ध्यामा बुधबार काठमाडौंमा पत्रकार सम्मेलन गर्दै आयोगले निर्वाचनको सम्पूर्ण तयारी पुरा भएको भन्दै उत्साहपूर्वक र सक्रिय रूपमा सहभागी हुन मतदातालाई आग्रह गरेको हो ।
पत्रकार सम्मेलनमा आयोगका कार्यवाहक प्रमुख निर्वाचन आयुक्त रामप्रसाद भण्डारीले संवैधानिक दायित्व अनुसार आयोग स्वच्छ, निष्पक्ष, पारदर्शी तथा विश्वसनीय निर्वाचनको दायित्व पूरा गर्न क्रियाशील रहेको बताउनुभयो ।
फाल्गुन २१ गते बिहान सात बजेदेखि साँझ पाँच बजेसम्म देशभर सम्पन्न हुने मतदानका लागि आवश्यक मतपत्र, मतपेटिका तथा अन्य निर्वाचन सामग्री सबै मतदान केन्द्रमा पुराइसकिएको उहाले बताउनुभयो । उहाले मतदाताले निर्बाध रूपमा आफूलाई मनपरेको उम्मेदवार र राजनीतिक दललाई मतदान गर्न पाउने गरी शान्ति सुरक्षाको भर, भरपर्दो प्रबन्ध मिलाइएको उल्लेख गर्नुभयो ।
निर्वाचन केवल आफ्नो प्रतिनिधि चुन्ने वा सरकार गठन गर्ने प्रक्रिया मात्र नभइ लोकतान्त्रिक वैधता नवीकरण गर्ने संवैधानिक अभ्यास समेत भएकाले मतदानमा सहभागी हुन उहाले अपील गर्नुभयो ।
भण्डारीले मतदानपछि छिटो मतपेटिका संकलन गर्ने प्रयास रहेको र २४ घण्टाभित्र प्रत्यक्षतर्फको नजिता प्रकाशित गर्ने तयारीमा रहेको बताउनुभयो । मतपेटिका सुरक्षाको सन्दर्भमा पहिलेदेखिको प्रचलनमा रहेको प्रावधानलाई परिवर्तन नगरिएको उहाको भनाइ छ ।
भण्डारीले अहिले निर्वाचनका लागि उत्साह देखिएकाले खस्ने परिणाम पनि प्रतिशतमा बढ्ने र बदर हुने प्रतिशत पनि घट्ने देखिएको बताउनुभयो । निर्वाचनमा प्रत्यक्षतर्फ तीन हजार ४०६ उम्मेदवार चुनावी प्रतिस्पर्धामा छन् भने सामानुपातिक निर्वाचन प्रणालीतर्फ तीन हजार १३५ उम्मेदवार प्रतिस्पर्धामा छन् यसपटकको निर्वाचनमा ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य गरी एक करोड ८९ लाख तीन हजार ६८९ मतदाता छन् । नर्वाचनका लागि देशभर १० हजार ९६७ मतदानस्थलमा २३ हजार ११२ मतदान केन्द्र निर्धारण गरिएको छ ।
