पानीको अभाव मै असार १५ को धान दिवस

मुगु ।केही बर्ष यता मुगु जिल्लामा बर्षेवाली लगाउने उपयुक्त समय असार महिनामा खडेरीको प्रकोप क्रमस बढदै जान थाले पछि भनेको बेला वाली लगाउन नपाउदा किसानहरुमा चिन्तित बन्न थालेको छन् ।

खडेरीले जमिन सुख्खा बन्दै गएको र पानीको श्रोतहरु समेत यतिबेला घट्दै जान थालेका छन् । असार १५ को अवसरमा कृषि विकास कार्यलय मुगुले आयोजना गरेको २१औं राष्ट्रिय धान दिवस कार्यक्रममा कर्मचारी र बजारवासी हिलो खेलेर रमाईलो गरे पनि किसानहरु भने उत्साहित देखिएका थिएनन् ।

पहिले कुलोबाट आएको पानीले एकै पटक खेत टम्म भरीएर रोपाई गर्दाको मजा र अहिले पाइप ल्याएको थोरै पानीले खेत भरिन लाग्ने समयले किसानहरु दिक्क बन्ने गरेका छन् ।
असारको मध्य हुदा समेत पानी नपरेर मुगुका वन पाखाहरु उजाड र नाङ्गा देखिएका छन् भने गह्रामा लगाइएका धान तथा कोदोको बेर्नाहरु समेत सुकेर नष्ट हुने अवस्थामा पुगेको देखिन्छ ।

असारमा रोपी सक्नु पर्ने जीउलो खडेरीका कारण न त धान रोपाई हुन सकेको छ न त कोदो नै सार्न सकिएको छ भन्दै किसानहरु चिन्तित बनेका छन् ।
यतिबेला सडक निर्माणको क्रममा ठाँउ ठाँउमा एस्काभेटर द्वारा जमिन छेद विछेद बनेका कारण र जथाभावी वन डढेलो लगाउनाले चर्को खडेरीले पानीका श्रोत सुक्तै गएको अनुमान गरिएको पाइन्छ ।

जलवायु परिवर्तन तथा वन जंगल माथी  स्थानीयहरुको अस्वभाविक गतिविधिलेले कैलै खडेरी त कैले वाढी पैरो जस्ता विपतहरु निम्तिदै जान थालेका देखिन्छन् ।
अधिकाँश जनसंख्या खेतीपातीमा निर्भर हुने गरेको मुगुमा पछिल्लो समय खडेरीको प्रकोप बढ्दै जान थाले पछि स्थानीयहरु के गरेर पेट पाल्ने भन्ने चिन्तामा देखिन्छन् ।
स्थानीय पाकापुस्ताहरु अहिलेका मानिसहरु धर्मछाडा र कुकर्ममा लाग्न थालेकाले बाडी पैरो र खडेरी जस्ता प्रकोपहरुले संङ्कट निम्तिदै गरेको बताउछन् ।
खडेरी लम्बिदै गएमा अन्न उत्पादन न्युन भै काहाली लाग्दो भोकमरीको सामना गर्नु पर्ने हो कि भन्ने पिरले स्थानीयवासीहरु निरास बन्न पुगेको देखिन्छ । 

कविराज कार्की सरोकार टेलिभिजन मुगु ।