नारायणगढ मुग्लिङ सडक खण्डकमा चारघण्टा सवारी आगमन बन्द हुने

चितवनको नारायणगढ मुग्लिङ सडक खण्डकमा पुल निर्माणका लागि आज देखि दैनिक चारघण्टा सवारी आवागमन रोक्न सुरु गरिएको छ । भौगोलिक रूपमा कठिन ठाउँमा रहेका चिसेन्जी खोला, कालीखोला, सिमलताल, तुइन खोलाका पुल निर्माणका लागि पहाड काट्न पर्ने र काटेर खस्न सक्ने पहाडलाई हटाउने समयको लागि सवारी आवागमन रोक्न थालिएको हो ।

पुस ५ गतेदेखि एक महिनाका लागि सडक रोकेर काम गर्ने प्रशासनसहितको सरोकारवालाको बैठकले निर्णय गरेको छ । सोहि निर्णय अनुसार काममा अवरोध नहोस् भन्ने उदेश्यले रोकेर काम थालिने चितवनका प्रमुख जिल्ला अधिकारी अस्मान तामाङले बताउनुभयो ।

सो बैठकले कुन सवारी साधनलाई कहाँ रोक्ने भन्ने विषयमा पनि कार्यपालिका बनाईसकेको छ । नारायणगढतर्फबाट जाने साना गाडीलाई १५ किलो बजारदेखि जुगेडीसम्म र ठूला गाडी भने भतेरी जङ्गलदेखि रामनगरसम्म रोकिने छ । काठमाण्डौबाट छुटेका गाडीलाई मुग्लिन बजारदेखि मनकामना केवलकार गेटसम्म र पोखराबाट छुटेका गाडीलाई बेनीटारदेखि पावर हाउससम्म रोकिने छ ।

यस्तै, काठमाण्डौबाट छुटेका मालवाहक गाडीलाई लेबाटारमा र पोखराबाट छुटेका मालवाहक गाडीलाई आँबुखैरहनीमा रोकिने छ ।सडक खण्डको ठाउँठाउँमा मर्मतको कार्य पनि यसै समयमा गरिने नारायणगढ–मुग्लिन सडक आयोजनाले जनाएको छ।