बसको ठक्करबाट विद्यार्थीको मृत्यु

कञ्चनपुरमा बसको ठक्करबाट शुक्रबार विहान एक जना विद्यार्थीको मृत्यु भएको छ । पूर्वपश्चिम महेन्द्र राजमार्गअन्तर्गत सुडामा ना ७ ख ६५२१ नम्वरको बसले साइकलयात्री विद्यार्थीलाई ठक्कर दिएको थियो । बसको ठक्करबाट बेदकोट नगरपालिका–६ का कविराज बैजको मृत्यु भएको जिल्ला प्रहरी कार्यालय कञ्चनपुरका प्रहरी नायब उपरीक्षक चक्रबहादुर शाहले जानकारी दिनुभयो । घर सिसैयाबाट साइकलमार्फत कलेज आइरहेका कविराजलाई महेन्द्रनगरबाट दार्चुला गइरहेको बसले ठक्कर दिएको हो ।

दुर्घटनामा मृत्यु भएका बैज महेन्द्रनगरस्थित कञ्चन विद्यामन्दिरमा स्नातक तह प्रथम वर्षमा अध्ययनरत रहेको कञ्चनपुर प्रहरीले जनाएको छ । घटनाको विरोधमा आक्रोशित स्थानीयवासीले पूर्व–पश्चिम राजमार्गमा अवरोध गरेको प्रहरीले जानकारी दिएको छ । ठक्कर दिने बस चालकलाई नियन्त्रणमा लिएर आवश्यक अनुसन्धान भै रहेको जिल्ला प्रहरी कार्यालय कञ्चनपुरले जनाएको छ ।