ट्रक खस्दा चालकको मृत्यु

भरतपुर । चितवनको नारायणगढ–मुग्लिन सडकखण्डको तीन नम्बर पुलबाट आज बिहान ट्रक खस्दा एक जनाको मृत्यु भएको छ । मुग्लिनबाट नारायणगढतर्फ आइरहेको बा २ ख ७४६२ नम्बरको खाली ट्रक भित्तापट्टिबाट पुलमुनि खसेको हो । ट्रक दुर्घटना हुँदा चालक धादिङको बेनिघाट रोराङ गाउँपालिकाका ४२ वर्षीय सन्तबहादुर राईको घटनास्थलमा नै मृत्यु भएको प्रहरीले जनाएको छ ।

इच्छाकामना गाउँपालिका–५ तीन नम्बर पुलबाट २० मिटर तल तुईन खोलामा टिपर खसेको जिल्ला प्रहरी कार्यालय चितवनका प्रवक्ता विजयाराज पण्डितले जानकारी दिनुभयो । ट्रक तिव्र गतिमा रहेका कारण अनियन्त्रित भई पल्टिएको उहाँको भनाई छ ।मृतकको शव परिक्षणका लागि भरतपुर अस्पतालमा राखिएको उहाँले बताउनुभयो । शव परीक्षण पछि मृतकका आफन्तलाई बुझाईने जिल्ला प्रहरी कार्यालय चितवनले जनाएको छ ।