मकवानपुर। बागमती प्रदेश सभाको भवन निर्माण नहुँदा दोस्रो कार्यकालको सुरुका बैठक साँघुरो भवनमा नै सञ्चालन हुने भएको छ । प्रदेश सभाको आफ्नै भवन र हलको अभावमा प्रदेश सभा बैठक र प्रदेश सभा सचिवालय हेटौँडा उपमहानगरपालिका–१० स्थित तत्कालीन क्षेत्रीय शिक्षा निर्देशनालयको साँघुरो भवनमा सञ्चालन हुँदै आएको छ ।
प्रदेश सभाको नयाँ भवन निर्माण गर्ने ठेक्का लिएको निर्माण कम्पनीले तोकिएको समयमा काम पूरा नगरेका कारण पुरानै अव्यवस्थित र साँघुरो भवनमा प्रदेश सभाको दोस्रो कार्यकालको पहिलो अधिवेशन सुरु गर्नुपर्ने बाध्यता रहेको बागमती प्रदेशको प्रदेश सभाका सचिव कृष्णहरि खड्काले बताउनुभयो । नयाँ भवन तोकिएको समयमा पूरा नभएको र निर्माणाधीन अवस्थामा रहेकोले पुरानै भवन र संरचनामा प्रदेश सभाको दोस्रो निर्वाचनपछिको प्रदेश सभाको अधिवेशन गर्नुपर्ने बाध्यता रहेको उहाँको भनाई छ ।
प्रदेश सभाको पहिलो कार्यकालको सुरुवातदेखि नै प्रदेश सभाका सदस्यले प्रदेश सभा बैठक, राजनीतिक दलहरूको संसदीय दलको कार्यालय र प्रदेश सभाको सचिवालय सञ्चालन गर्न पर्याप्त नभएको, अव्यवस्थित र साँघुरो भएको भन्दै नयाँ भवन निर्माण गर्न माग गरिएको थियो । सोहि अनुसार २०७७ मङ्सिर १० गते प्रदेश सभाका निवर्तमान सभामुख सानुकुमार श्रेष्ठले प्रदेश सभा भवनको शिलान्यास गर्नुभएको थियो ।
यो समाचार पढेर तपाईको प्रतिक्रिया के छ?