बालिकाको मृत्यु भएपछि धनगढी बजार तनावग्रस्त

धनगढी । कैलालीमा  ग्रेडरले कुल्चिँदा एक बालिकाको मृत्यु भएपछि धनगढी बजार तनावग्रस्त बनेको छ । धनगढी उपहमानगरपालिका ५ हसनपुरमा ग्रेडरले कुल्चिँदा १५ वर्षीया चेतना साउदको मृत्यु भएको प्रहरीले जनाएको छ ।

कालिका कन्ट्रक्सनको ना १ क ९७५ नम्बरको ग्रेडरले ठक्कर दिएर कुल्चिँदा  बालिकाको घटनास्थलमा नै मृत्यु भएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक (डीएसपी) वेदप्रकाश जोशीले बताउनुभयो । पञ्चोदय माध्यमिक विद्यालय हसनपुरमा ८ कक्षामा अध्ययनरत बालिकाको मृत्यु भएपछि  स्थानीयहरुले सडकमा अवरुद्ध गरि विरोध गरिरहेका छन् । घटनास्थलमा आफन्त र स्थानीयहरुले विरोध गर्दा सवारी आगामन ठप्प बनेको छ ।

बालिका साइकलमा विद्यालय जाँदै गर्दा सडकको लेवल मिलाउँदै गरेको अवस्थामा ब्याक गर्ने क्रममा ग्रेडरले ठक्कर दिएको थियो । ग्रेडर चालक चितवन भरतपुर महानगरपालिका २८ का २७ वर्षीय विमल कुमाललाई प्रहरीले नियन्त्रणमा लिएको छ । घटना स्थलमा अहिले प्रहरीको टोली परिचालन गरिएको छ ।